ಕೈದಿಗಳ ತಿಂಗಳ ಸಂಬಳ ೧೬ ಸಾವಿರಕ್ಕೆ ದಿಢೀರ್‌ ಏರಿಕೆ

ರಾಜ್ಯ ಗೃಹ ಇಲಾಖೆ ಆದೇಶ, ದೇಶದಲ್ಲೇ   ಹೆಚ್ಚು ಸಂಬಳ ಪಡೆಯುವ ರಾಜ್ಯದ ಕೈದಿಗಳು

ಬೆಂಗಳೂರು : ಕೈದಿಗಳಿಗೆ ರಾಜ್ಯ ಸರ್ಕಾರ ಬಂಪರ್‌ ಕೊಡುಗೆ ನೀಡಿದ್ದು, ಏಕಾಏಕಿ ತಿಂಗಳಿಗೆ 16 ಸಾವಿರ ಸಂಬಳ ನಿಗದಿ ಮಾಡಿದೆ.
ಈ ಹಿಂದಿನ ಸಂಬಳಕ್ಕಿಂತ ಮೂರು ಪಟ್ಟು ಏರಿಕೆಯಾಗಿದ್ದು, ತಿಂಗಳಿಗೆ 15,990 ರೂ. ಸಂಬಳ ಪಡೆಯುವ ಮೂಲಕ ದೇಶದಲ್ಲೇ ರಾಜ್ಯದ ಕೈದಿಗಳಿಗೆ ಅತಿ ಹೆಚ್ಚು ಸಂಬಳ ದೊರೆತಂತಾಗಿದೆ.
ರಾಜ್ಯ ಸರ್ಕಾರ ಕೈದಿಗಳಿಗೆ ಹೊಸ ವರ್ಷಕ್ಕೆ ಬಂಪರ್‌ ಕೊಡುಗೆ ನೀಡಿದ್ದು, ಕೈದಿಗಳ ಸಂಬಳವನ್ನು ಮೂರುಪಟ್ಟು ಜಾಸ್ತಿ ಮಾಡಿ ರಾಜ್ಯ ಗೃಹ ಇಲಾಖೆ ಆದೇಶ ಹೊರಡಿಸಿದೆ. ಇದರಿಂದ ವಿವಿಧ ಪ್ರಕರಣಗಳಲ್ಲಿ ಜೈಲು ಸೇರಿ ಶಿಕ್ಷೆ ಅನುಭವಿಸುತ್ತಿರುವ ಕೈದಿಗೆ ಮೂರು ಪಟ್ಟು ಸಂಬಳ ಜಾಸ್ತಿಯಾದಂತಾಗಿದೆ. 
54 ಕಾರಾಗೃಹ, 3,565 ಕೈದಿಗಳು :
ರಾಜ್ಯದಲ್ಲಿ ಒಟ್ಟು 54 ಕಾರಾಗೃಹಗಳಿದ್ದು, 3,565 ಕೈದಿಗಳಿದ್ದಾರೆ. ಇವರಿಗೆ ಒಂದು ವರ್ಷಕ್ಕೆ ಕೊಡಲಾಗುವ ಒಟ್ಟು ಸಂಬಳ 58 ಕೋಟಿ 28 ಲಕ್ಷದ 34,720 ರೂಪಾಯಿ.
ಕೈದಿಗಳ ಸಂಬಳದ ವಿವರ
ಒಂದು ವರ್ಷದವರೆಗೆ ಕೈದಿಗಳಿಗೆ ನಿತ್ಯ 524 ರೂ. ಸಂಬಳ ನಿಗದಿ ಪಡಿಸಲಾಗುತ್ತದೆ. ವರ್ಷದ ಬಳಿಕ ಅವರನ್ನು ಕುಶಲ ಬಂಧಿ ಎಂದು ಪರಿಗಣಿಸಿ ದಿನಕ್ಕೆ 548 ರೂಪಾಯಿ ಸಂಬಳ ನೀಡಲಾಗುತ್ತದೆ. ವಾರದ ರಜೆ ಪಡೆದು ಕೆಲಸ ಮಾಡಿದರೆ, ಆ ಕೈದಿಗೆ ತಿಂಗಳಿಗೆ 14,248 ರೂಪಾಯಿ ವೇತನ ಸಿಗುತ್ತದೆ. ಎರಡು ವರ್ಷಗಳಾದ ಮೇಲೆ ಆ ಕೈದಿಯನ್ನು ಅರೆ ಕುಶಲ ಬಂಧಿ ಎಂದು ಪರಿಗಣಿಸಿ ದಿನಕ್ಕೆ 615 ರೂಪಾಯಿ ಸಂಬಳ ನೀಡಲಾಗುತ್ತದೆ. ವಾರದ ರಜೆ ಪಡೆದು ಕೆಲಸ ಮಾಡಿದರೆ ತಿಂಗಳಿಗೆ 15,990 ರೂಪಾಯಿ ಸಿಗುತ್ತದೆ.
ಮೂರು ವರ್ಷ ಅನುಭವ ಆದ ಬಳಿಕ ತರಬೇತಿ ಕೆಲಸಗಾರ ಬಂಧಿ ಎಂದು ಪರಿಗಣಿಸಿ, ಆ ಕೈದಿಗೆ ದಿನಕ್ಕೆ 663 ರೂಪಾಯಿ ಸಂಬಳ ನಿಗದಿಪಡಿಸಲಾಗುತ್ತದೆ. ವಾರದ ರಜೆ ಪಡೆದು ಕೆಲಸ ಮಾಡಿದರೆ ಸಿಗುವ ತಿಂಗಳ ಸಂಬಳ 17,238 ರೂಪಾಯಿ!
ಒಟ್ಟಾರೆ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿ ಜೈಲು ಪಾಲಾಗಿರುವ ಕೈದಿಗಳಿಗೆ 'ಅಚ್ಛೇದಿನ್' ಆರಂಭವಾಗಿವೆ.