ಗೆಳೆಯನ ಕತ್ತುಕೊಯ್ಯಲು ಹೇಗಾದ್ರೂ ಮನಸ್ಸಾಯ್ತು ಈ ದುರುಳರಿಗೆ

ಧನು ಕೊಲೆಗೆ ತಿಂಗಳ ಹಿಂದೆಯೇ ಪ್ಲಾನ್ ನಡೆದಿತ್ತು

 ಕೊಲೆಯಾದ ಧನು @ ಧನಂಜಯ್ಯ

ವರದಿ-ವಿಶ್ವನಾಥ್, ಪಾಂಡವಪುರ

ಪಾಂಡವಪುರ : ಕಳೆದ ಸೆಪ್ಟಂಬರ್ 29ರ ರಾತ್ರಿ ಮಂಡ್ಯ ಜಿಲ್ಲೆ, ಪಾಂಡವಪುರ ತಾಲ್ಲೂಕಿನ ಲಕ್ಷ್ಮಿಸಾಗರ ಗ್ರಾಮದ ಸಮೀಪ ನೀಲನಹಳ್ಳಿ ಗೇಟ್‍ನಲ್ಲಿ ಅದೇ ತಾನೆ ತನ್ನ ಗೆಳೆಯರ ಜತೆ ಢಾಬಾದಲ್ಲಿ ಊಟ ಮುಗಿಸಿ ಹೊರಬಂದ ಧನು ಅಲಿಯಾಸ್ ಧನಂಜಯ್ಯ ಎಂಬ 22 ವರ್ಷದ ಯುವಕನನ್ನು ಐದು ಜನ ಯುವಕರ ಗುಂಪೊಂದು ಅಡ್ಡಗಟ್ಟಿ ಚಾಕುವಿನಿಂದ ತಿವಿದು, ಕೆಳಕ್ಕೆ ಕೆಡವಿ ಸರಸರನೆ ಕತ್ತುಕೊಯ್ದು ಕ್ಷಣಮಾತ್ರದಲ್ಲಿ ಆತನ ಕತೆ ಮುಗಿಸಿ ಕೇಕೆ ಹಾಕಿ ನಕ್ಕಿತ್ತು.

ಕೊಲೆಯ ನಂತರ ಕೊಲೆಗಡುಕರು ತಾವು ಮಾಡಿದ ಘನಂದಾರಿ ಕೆಲಸವನ್ನು ವಾಟ್ಸಾಪ್ ಸ್ಟೇಟಸ್ ಮೂಲಕ ಹರಿಬಿಟ್ಟು ವಿಕೃತಿಯನ್ನು ಮೆರೆದಿದ್ದರು. ಗೆಳೆಯರಿಗೆ ಫೋನ್ ಕರೆಗಳನ್ನು

ಮಾಡಿ ಆತನ ಕತೆ ಮುಗಿಸಿರುವುದಾಗಿ ಹೇಳಿ ಅಟ್ಟಹಾಸ ಮೆರೆದಿದ್ದರು. 

ತಮ್ಮದೇ ಊರಿನ ತಮ್ಮೊಂದಿಗೆ ಆಡಿ, ಹಾಡಿ, ಉಂಡು, ತಿಂದು ಬೆಳೆದ ಗೆಳೆಯನ ಕತ್ತುಕೊಯ್ದು ಕೊಲೆ ಮಾಡುವಷ್ಟು ಜಿದ್ದು ಏನಿತ್ತು? ಎನ್ನುವುದನ್ನು ಕೇಳಿದರೆ ಬೆಚ್ಚಿ ಬೀಳುತ್ತೀರಿ.

ಕೊಲೆಯ ಹಿಂದೆ ಅಬಕಾರಿ ಮಾಫಿಯಾದ

ಕಾಣದ ಕೈಗಳು ಕೆಲಸ ಮಾಡಿದ್ದವು ಎಂದು ಧನು ತಂದೆ ಸ್ವಾಮಿ ಆರೋಪಿಸುತ್ತಾರೆ. ಹಳ್ಳಿಗಳ ಪೆಟ್ಟಿ ಅಂಗಡಿಗಳಿಗೆ ಪಾಂಡವಪುರದ ವೈನ್ ಸ್ಟೋರ್‍ಗಳಿಂದ ಮದ್ಯವನ್ನು ಅಕ್ರಮವಾಗಿ ಸಾಗಿಸುವ ನೆಟ್‍ವರ್ಕ್ ಧನು ಕೊಲೆಗೆ ಕಾರಣವಾಗಿತ್ತು ಎನ್ನುವುದು ಧನು ತಂದೆ ಸ್ವಾಮಿ ಆರೋಪ.

`ಕೊಲೆಗೆ ಒಂದು ತಿಂಗಳ ಹಿಂದೆಯೇ ಪ್ಲಾನ್ ನಡೆದಿತ್ತು. ಅಬಕಾರಿ ಮಾಫಿಯಾ ನನ್ನ ಮಗನ ಕೊಲೆಗೆ ಕಾರಣವಾಗಿದೆ. 22-8-2022 ರಂದು ಸ್ಕೂಟರ್‍ನಲ್ಲಿ ಅಕ್ರಮವಾಗಿ ಮದ್ಯ ಸಾಗಾಟ ಮಾಡುತ್ತಿದ್ದ ರಾಘು ಎಂಬ ಯುವಕನನ್ನು ನಮ್ಮದೇ ಗ್ರಾಮದ ಕೆಲವು ಯುವಕರು ತಡೆದು ಪ್ರಶ್ನಿಸಿದರು. ಈ ಘಟನೆಯನ್ನು ನನ್ನ ಮಗ ಧನು ವಿಡಿಯೋ ಮಾಡಿದ್ದ. ಅಷ್ಟೇ ಅವನು ಮಾಡಿದ್ದ ತಪ್ಪು. ಇದು ದ್ವೇಷಕ್ಕೆ ಕಾರಣವಾಗಿದೆ. ದಿನನಿತ್ಯ ಹಳ್ಳಿಗಳಿಗೆ ಅಕ್ರಮವಾಗಿ ಮದ್ಯ ಸಾಗಾಟ ಮಾಡುತ್ತಿದ್ದವರು ತಮ್ಮ ಅಕ್ರಮ ವ್ಯವಹಾರಕ್ಕೆ ಯುವಕರಿಂದ ಅಡ್ಡಿ ಉಂಟಾದರೆ ಮುಂದೆ ತಮ್ಮ ಸಂಪಾದನೆಗೆ ಕತ್ತರಿ ಬೀಳಬಹುದು. ಇದಕ್ಕೊಂದು ಅಂತ್ಯ ಹಾಡಬೇಕೆಂದು ನನ್ನ ಮಗನ ಕೊಲೆಗೆ ಸ್ಕೆಚ್ ಹಾಕಲಾಯಿತು.

ಕೊಲೆ ಮಾಡಿದ ಆರೋಪಿಗಳ ತಂಡ

29-8-2022 ರಂದು ರಾತ್ರಿ ಸುಮಾರು 10 ಗಂಟೆಗೆ ನನ್ನ ಮಗ ಧನು ತನ್ನ ಗೆಳೆಯರಾದ ರವಿ ಮತ್ತು ಕಿರಣ್ ಜತೆ ನೀಲನಹಳ್ಳಿ ಗೇಟ್ ಬಳಿಯ ಡಾಬಾದಲ್ಲಿ ಊಟ ಮಾಡಿ ಹೊರಬರುತ್ತಲೇ ಅಡ್ಡಗಟ್ಟಿದ ರೋಹಿತ್, ದರ್ಶನ್, ರಾಘು, ಸುನೀಲ್ ಮತ್ತು ರಮೇಶ ಕ್ಷಣಮಾತ್ರದಲ್ಲೇ ಆತನಿಗೆ ಚೂರಿಯಿಂದ ತಿವಿದು ಕೆಳಕ್ಕೆ ಕೆಡವಿ ಕತ್ತನ್ನು
ಕೊಯ್ದು ಕೊಲೆ ಮಾಡಿದ್ದಾರೆ. ಎಲ್ಲರ ಮೇಲೂ ಎಫ್‍ಐಆರ್ ಆಗಿದೆ. ನಾಲ್ಕು ಜನ ಸಿಕ್ಕಿದ್ದಾರೆ. ಅವರನ್ನು ನ್ಯಾಯಾಂಗ ಬಂಧನಕ್ಕೆ ನೀಡಲಾಗಿದೆ. ಮತ್ತೊಬ್ಬ ತಲೆ ಮರೆಸಿಕೊಂಡಿದ್ದಾನೆ ಎಂದರು.
ಹರೆಯದ ಮಗನನ್ನು ಕಳೆದುಕೊಂಡಿದ್ದೇನೆ. ಆರೋಪಿಗಳು ಸಿಕ್ಕಿದ್ದಾರೆ ನಿಜ. ಆದರೆ, ಅವರೆಂದಿಗೂ ಮತ್ತೆ ಬಿಡುಗಡೆ ಆಗಬಾರದು. ನನ್ನ ಮಗನಿಗೆ ಆದ ಸ್ಥಿತಿ ಬೇರೆ ಯಾರಿಗೂ ಬರಬಾರದು ಎಂಬುದೇ ಸ್ವಾಮಿ ಅವರ ಅಭಿಲಾಷೆ.
ಕೊಲೆ ಆರೋಪಿ ರೋಹಿತ್ ಜತೆಯಲ್ಲೇ ಇದ್ದ ಧನು ಇತ್ತೀಚೆಗೆ ಆತನ ಆಟಾಟೋಪಗಳನ್ನು ಕಂಡು ಅವನಿಂದ ದೂರವಾಗಿದ್ದ. ಇದನ್ನೆ ನೆಪ ಮಾಡಿಕೊಂಡ ರೋಹಿತ್ ಧನುವಿನ ಮೇಲೆ ಆಗಾಗ್ಗೆ ಕತ್ತಿ ಮಸೆಯುತ್ತಿದ್ದ. ಊರಿನಲ್ಲಿ ಯಾವುದೇ ಜಗಳ, ಗಲಾಟೆಯಾದರೂ ಅದರಲ್ಲಿ ಧನುವಿನ ಹೆಸರನ್ನು ಉದ್ಧೇಶಪೂರ್ವಕವಾಗಿ ಸೇರಿಸಲಾಗುತ್ತಿತ್ತು. ಸಭ್ಯನಿಗೆ ರೌಡಿಪಟ್ಟ ಕಟ್ಟುವ ಉದ್ದೇಶವೂ ಇತ್ತು. ಸಣ್ಣ ಪುಟ್ಟದ್ದಕ್ಕೆಲ್ಲಾ ರೋಹಿತ್ ಧನುವಿಗೆ ಫೋನ್ ಕರೆ ಮಾಡಿ. ಧಮಕಿ ಹಾಕುವುದು. ಹೆದರಿಸುವುದು. ನಿನ್ನ ಕತೆ ಮುಗಿಸುತ್ತೇನೆ ಎನ್ನುವುದು ಮಾಡುತ್ತಿದ್ದ. ಹಲವಾರು ಬಾರಿ ಧನುವಿನ ಮೇಲೆ ಹಲ್ಲೆಗೂ ಯತ್ನ ನಡೆದಿತ್ತು. ಈ ಬಗ್ಗೆ ಧನು ಮೇಲುಕೋಟೆ ಠಾಣೆಗೆ ದೂರನ್ನೂ ಸಹ ನೀಡಿದ್ದ, ಪೊಲೀಸರು ರೋಹಿತ್‍ನನ್ನು ಕರೆದು ಮುಚ್ಚಳಿಕೆ ಬರೆಸಿಕೊಂಡಿದ್ದರು. ಇಷ್ಟಾದರೂ ಹಗೆತನ ಮುಂದುವರಿದು ಧನುವಿನ ಕೊಲೆಯಲ್ಲಿ ಅಂತ್ಯವಾಗಿದೆ. 

ಮಗನನ್ನು  ಕಳೆದುಕೊಂಡು ನೊಂದ ಕುಟುಂಬ 

ಧನು ಅಲಿಯಾಸ್ ಧನಂಜಯ್ಯನ ಮನೆಯಲ್ಲಿ ಸ್ಮಶಾನ ಮೌನ. ಬೆಳೆದ ಮಗನನ್ನು ಕಳೆದುಕೊಂಡ ತಂದೆ, ತಾಯಿ, ಅಜ್ಜಿ, ಸಹೋದರನ ರೋಧನ ಇನ್ನೂ ನಿಂತಿಲ್ಲ. ಗ್ರಾಮಸ್ಥರು, ನೆಂಟರಿಷ್ಟರ ಸಾಂತ್ವಾನಗಳು ನಡೆದಿವೆ. ಆದರೂ ಹರೆಯದ ಮಗನನ್ನು ಕಳೆದುಕೊಂಡ ನೋವು ಮಡುಗಟ್ಟಿದೆ.